ਮੈਲਬਰਨ : ਵਿਕਟੋਰੀਆ ਦੇ ਪੇਂਡੂ ਇਲਾਕੇ Bendigo ’ਚ ਸਥਿਤ ਇੱਕ ਮਾਰਕਿਟਪਲੇਟ ਅੰਦਰ ਕੰਮ ਕਰਦੇ ਇੱਕ ਪੰਜਾਬੀ ਮੂਲ ਦੇ ਸਿਕਿਉਰਿਟੀ ਗਾਰਡ ’ਤੇ ਹਿੰਸਕ ਹਮਲਾ ਕਰਨ ਵਾਲਾ 17 ਸਾਲ ਦਾ ਮੁੰਡਾ ਸਜ਼ਾ ਤੋਂ ਬਚ ਗਿਆ ਹੈ। ਇਸ ਨਾਬਾਲਗ ਨੇ ਅਦਾਲਤ ਵਿੱਚ ਇੱਕ ਨੇਤਰਹੀਣ ਵਿਅਕਤੀ ’ਤੇ ਹਮਲਾ ਕਰਨ ਸਮੇਤ ਕਈ ਹੋਰ ਹਮਲਿਆਂ ਅਤੇ ਬਿਨਾਂ ਲਾਇਸੈਂਸ ਦੇ ਡਰਾਈਵਿੰਗ ਕਰਨ ਦਾ ਦੋਸ਼ ਵੀ ਕਬੂਲ ਕੀਤਾ ਸੀ। ਉਸ ਨੂੰ 12 ਮਹੀਨਿਆਂ ਦੇ ਚੰਗੇ ਵਿਵਹਾਰ ਦੇ ਬਾਂਡ ਅਤੇ ਲਾਜ਼ਮੀ ਕਾਉਂਸਲਿੰਗ ਦੀ ਸ਼ਰਤ ’ਤੇ ਸਜ਼ਾ ਨਹੀਂ ਦਿੱਤੀ ਗਈ।
3 ਮਾਰਚ ਨੂੰ, ਨੌਂ ਨਾਬਾਲਗਾਂ ਨੇ ਇੱਕ ਸਿੱਖ ਸੁਰੱਖਿਆ ਗਾਰਡ ’ਤੇ ਕਥਿਤ ਤੌਰ ’ਤੇ ਹਮਲਾ ਕਰ ਕੇ ਉਸ ’ਤੇ ਨਸਲੀ ਟਿੱਪਣੀਆਂ ਕੀਤੀਆਂ ਸਨ, ਉਸ ਦੀ ਕੁੱਟਮਾਰ ਕੀਤੀ ਅਤੇ ਪੱਗ ਵੀ ਉਤਾਰ ਦਿੱਤੀ ਸੀ। ਅਦਾਲਤ ਨੇ ਉਸ ਦੀ ਬੌਧਿਕ ਅਪਾਹਜਤਾ, ਪਛਤਾਵਾ ਅਤੇ ਸੁਧਾਰ ਦੀਆਂ ਕੋਸ਼ਿਸ਼ਾਂ ਨੂੰ ਨੋਟ ਕੀਤਾ, ਜਿਸ ਵਿੱਚ ਨਕਾਰਾਤਮਕ ਪ੍ਰਭਾਵਾਂ ਨਾਲ ਸੰਬੰਧ ਕੱਟਣਾ ਅਤੇ ਕੰਮ ਸ਼ੁਰੂ ਕਰਨਾ ਸ਼ਾਮਲ ਹੈ। ਮੈਜਿਸਟਰੇਟ Trieu Huynh ਨੇ ਹਮਲੇ ਦੌਰਾਨ ਨਸਲਵਾਦੀ ਤਾਅਨਿਆਂ ਦੀ ਨਿੰਦਾ ਕੀਤੀ ਅਤੇ ਇਸ ਦਾ ਪੂਰੇ ਭਾਈਚਾਰੇ ’ਤੇ ਅਸਰ ਪੈਣ ’ਤੇ ਜ਼ੋਰ ਦਿੱਤਾ। ਪੁਲਿਸ ਨੇ ਪੁਸ਼ਟੀ ਕੀਤੀ ਕਿ ਇਹ ਘਟਨਾ ਨਸਲੀ ਤੌਰ ‘ਤੇ ਪ੍ਰੇਰਿਤ ਨਹੀਂ ਸੀ, ਹਾਲਾਂਕਿ ਸਿੱਖ ਭਾਈਚਾਰੇ ਨੇ ਡੂੰਘੀ ਚਿੰਤਾ ਜ਼ਾਹਰ ਕੀਤੀ। ਇਹ ਹਮਲਾ ਕਿਸ਼ੋਰਾਂ ਦੇ ਸ਼ਰਾਬ ਪੀਣ ਅਤੇ ਉੱਚੀ ਆਵਾਜ਼ ਵਿੱਚ ਸੰਗੀਤ ਵਜਾਉਣ ਦੀਆਂ ਰਿਪੋਰਟਾਂ ਤੋਂ ਬਾਅਦ ਹੋਇਆ ਸੀ।
