ਨਿਊਜ਼ੀਲੈਂਡ ’ਚ ਲੇਬਰ ਪਾਰਟੀ ਨੇ ਐਲਾਨੀ ਪਬਲਿਕ ਟਰਾਂਸਪੋਰਟ ਬਾਰੇ ਨੀਤੀ, ਕਿਰਾਏ ਲਈ ਹਫ਼ਤਾਵਾਰੀ ਕੈਪ ਲਗਾਉਣ ਦਾ ਵਾਅਦਾ

ਆਕਲੈਂਡ : ਨਿਊਜ਼ੀਲੈਂਡ ਦੀ Labour ਪਾਰਟੀ ਨੇ ਆਗਾਮੀ ਚੋਣਾਂ ਜਿੱਤਣ ’ਤੇ ਦੇਸ਼ ਵਿੱਚ ਪਬਲਿਕ ਟ੍ਰਾਂਸਪੋਰਟ ਨੂੰ ਸਸਤਾ ਬਣਾਉਣ ਲਈ ਇੱਕ ਵੱਡੀ ਨੀਤੀ ਦਾ ਐਲਾਨ ਕੀਤਾ ਹੈ। ਪਾਰਟੀ ਦੇ ਲੀਡਰ Chris Hipkins ਮੁਤਾਬਕ, ਜੇਕਰ ਉਨ੍ਹਾਂ ਦੀ ਸਰਕਾਰ ਬਣਦੀ ਹੈ ਤਾਂ ਮੁੱਖ ਸ਼ਹਿਰਾਂ ਵਿੱਚ ਪਬਲਿਕ ਟਰਾਂਸਪੋਰਟ ਦਾ ਕਿਰਾਇਆ ਵੱਧ ਤੋਂ ਵੱਧ 20 ਡਾਲਰ ਪ੍ਰਤੀ ਹਫ਼ਤਾ ਅਤੇ ਬਾਕੀ ਖੇਤਰਾਂ ਵਿੱਚ 10 ਡਾਲਰ ਪ੍ਰਤੀ ਹਫ਼ਤਾ ਨਿਰਧਾਰਤ (cap) ਕੀਤਾ ਜਾਵੇਗਾ।

ਇਹ ਨਵੀਂ ਨੀਤੀ 1 ਜੁਲਾਈ 2027 ਤੋਂ ਲਾਗੂ ਕਰਨ ਦਾ ਟੀਚਾ ਹੈ। 20 ਡਾਲਰ ਦਾ ਹਫ਼ਤਾਵਾਰੀ ਕੈਪ Auckland, Wellington, ਅਤੇ Christchurch ਵਰਗੇ ਮੁੱਖ ਕੇਂਦਰਾਂ ’ਤੇ ਲਾਗੂ ਹੋਵੇਗਾ, ਕਿਉਂਕਿ ਉੱਥੇ ਸੇਵਾਵਾਂ ਵਧੇਰੇ ਹਨ। ਬਾਕੀ ਛੋਟੇ ਸ਼ਹਿਰਾਂ ਅਤੇ ਕਸਬਿਆਂ ਲਈ ਇਹ ਹੱਦ 10 ਡਾਲਰ ਹੋਵੇਗੀ।

Labour ਦੇ ਟਰਾਂਸਪੋਰਟ ਸਪੋਕਸਪਰਸਨ Tangi Utikere ਨੇ ਕਿਹਾ ਕਿ ਇਸ ਕਦਮ ਨਾਲ ਆਮ ਲੋਕਾਂ ’ਤੇ ਰਹਿਣ-ਸਹਿਣ ਦਾ ਖਰਚਾ (cost-of-living) ਘਟੇਗਾ ਅਤੇ ਸੜਕਾਂ ’ਤੇ ਟ੍ਰੈਫਿਕ ਦੀ ਸਮੱਸਿਆ ਤੋਂ ਵੀ ਨਿਜਾਤ ਮਿਲੇਗੀ। ਅਨੁਮਾਨ ਹੈ ਕਿ ਇਸ ਨਾਲ ਪ੍ਰਤੀ ਯਾਤਰੀ ਹਫ਼ਤੇ ਵਿੱਚ 25 ਡਾਲਰ ਅਤੇ ਸਾਲਾਨਾ 1200 ਡਾਲਰ ਤੱਕ ਦੀ ਬਚਤ ਹੋ ਸਕਦੀ ਹੈ।

ਇਸ ਯੋਜਨਾ ’ਤੇ ਸਾਲਾਨਾ ਲਗਭਗ 65 ਮਿਲੀਅਨ ਡਾਲਰ ਦਾ ਖਰਚਾ ਆਵੇਗਾ, ਜੋ National Land Transport Fund ਦਾ ਸਿਰਫ਼ 1 ਫੀਸਦੀ ਹਿੱਸਾ ਹੋਵੇਗਾ। ਇਹ ਕੈਪ ਬੱਸਾਂ, ਟ੍ਰੇਨਾਂ ਅਤੇ ਫੈਰੀਆਂ ’ਤੇ ਲਾਗੂ ਹੋਵੇਗਾ, ਹਾਲਾਂਕਿ InterCity ਬੱਸਾਂ ਅਤੇ Waiheke ਫੈਰੀਆਂ ਵਰਗੀਆਂ ਕੁਝ ਸੇਵਾਵਾਂ ਇਸ ਦੇ ਦਾਇਰੇ ਤੋਂ ਬਾਹਰ ਰਹਿਣਗੀਆਂ।