- ਨਵੀਂ ਖੋਜ ਭਵਿੱਖ ’ਚ ਜੀਨ-ਥੈਰੇਪੀ ਅਤੇ ਸਥਾਈ ਇਲਾਜ ਦੇ ਨਵੇਂ ਰਸਤੇ ਖੋਲ੍ਹੇਗੀ
- Parkinson’s ਅਤੇ Huntington’s ਵਰਗੀਆਂ ਹੋਰ ਗੰਭੀਰ ਬਿਮਾਰੀਆਂ ਨੂੰ ਸਮਝਣ ਅਤੇ ਇਲਾਜ ਲੱਭਣ ’ਚ ਵੀ ਮਿਲੇਗੀ ਵੱਡੀ ਮਦਦ
ਔਕਲੈਂਡ : ਨਿਊਜ਼ੀਲੈਂਡ ਦੇ ਵਿਗਿਆਨੀਆਂ ਨੇ ਦਿਮਾਗ ਦੀ ਇੱਕ ਬਹੁਤ ਹੀ ਦੁਰਲੱਭ ਅਤੇ ਗੰਭੀਰ ਬਿਮਾਰੀ ਦੇ ਕਾਰਨਾਂ ਨੂੰ ਸਮਝਣ ’ਚ ਇੱਕ ਇਤਿਹਾਸਕ ਸਫਲਤਾ ਹਾਸਲ ਕੀਤੀ ਹੈ। University of Auckland ਦੇ ਖੋਜਕਰਤਾਵਾਂ, ਜਿਨ੍ਹਾਂ ’ਚ ਡਾ. ਮਲਵਿੰਦਰ ਸਿੰਘ-ਬੈਂਸ ਅਤੇ Dr. Adelie Tan ਸ਼ਾਮਲ ਹਨ, ਨੇ X-linked dystonia-parkinsonism (XDP) ਨਾਮਕ ਜੈਨੇਟਿਕ ਬਿਮਾਰੀ ’ਤੇ ਇਹ ਅਹਿਮ ਖੋਜ ਕੀਤੀ ਹੈ।
XDP ਇੱਕ ਅਜਿਹੀ ਬਿਮਾਰੀ ਹੈ ਜੋ ਹੌਲੀ-ਹੌਲੀ ਦਿਮਾਗ ਦੇ ਉਨ੍ਹਾਂ ਹਿੱਸਿਆਂ ਨੂੰ ਨੁਕਸਾਨ ਪਹੁੰਚਾਉਂਦੀ ਹੈ ਜੋ ਸਾਡੇ ਸਰੀਰ ਦੀਆਂ ਹਰਕਤਾਂ ਨੂੰ ਕੰਟਰੋਲ ਕਰਦੇ ਹਨ। ਇਹ ਬਿਮਾਰੀ ਜ਼ਿਆਦਾਤਰ ਨੌਜਵਾਨ ਆਦਮੀਆਂ ਨੂੰ ਪ੍ਰਭਾਵਿਤ ਕਰਦੀ ਹੈ, ਖਾਸ ਕਰਕੇ ਉਨ੍ਹਾਂ ਨੂੰ ਜਿਨ੍ਹਾਂ ਦੇ ਪੁਰਖਿਆਂ ਦਾ ਸਬੰਧ Philippines ਦੇ Panay Island ਨਾਲ ਹੈ। ਇਸ ਬਿਮਾਰੀ ਕਾਰਨ ਮਰੀਜ਼ਾਂ ਦੇ ਪੱਠੇ ਅਣਚਾਹੇ ਤੌਰ ’ਤੇ ਸੁੰਗੜਦੇ ਹਨ ਅਤੇ ਸਰੀਰ ’ਚ ਅਕੜਾਅ ਆ ਜਾਂਦਾ ਹੈ।
ਪਹਿਲਾਂ ਵਿਗਿਆਨੀਆਂ ਦਾ ਮੰਨਣਾ ਸੀ ਕਿ ਇਹ ਬਿਮਾਰੀ ਦਿਮਾਗ ਦੇ ਸਟ੍ਰਾਈਟਮ ਦੇ ‘ਸਟ੍ਰਾਈਓਸੋਮਜ਼’ ਹਿੱਸੇ ਨੂੰ ਪ੍ਰਭਾਵਿਤ ਕਰਦੀ ਹੈ। ਪਰ ਜਦੋਂ ਡਾ. ਮਲਵਿੰਦਰ ਸਿੰਘ-ਬੈਂਸ ਦੀ ਟੀਮ ਨੇ XDP ਨਾਲ ਪ੍ਰਭਾਵਿਤ ਮਰੀਜ਼ਾਂ ਦੇ ਦਿਮਾਗੀ ਟਿਸ਼ੂਆਂ ਦਾ ਡੂੰਘਾਈ ਨਾਲ ਅਧਿਐਨ ਕੀਤਾ, ਤਾਂ ਨਤੀਜੇ ਬਿਲਕੁਲ ਉਲਟ ਸਨ। ਟੀਮ ਇਹ ਦੇਖ ਕੇ ਪੂਰੀ ਤਰ੍ਹਾਂ ਹੈਰਾਨ ਰਹਿ ਗਈ ਕਿ ਇਸ ਬਿਮਾਰੀ ਦਾ ਸਭ ਤੋਂ ਵੱਧ ਨੁਕਸਾਨ ਦਿਮਾਗ ਦੇ ‘ਮੈਟ੍ਰਿਕਸ’ (matrix) ਹਿੱਸੇ ਨੂੰ ਹੁੰਦਾ ਹੈ, ਜੋ ਸਾਡੀਆਂ ਹਰਕਤਾਂ ਨੂੰ ਕੰਟਰੋਲ ਕਰਨ ’ਚ ਮੁੱਖ ਭੂਮਿਕਾ ਨਿਭਾਉਂਦਾ ਹੈ।
ਇਸ ਖੋਜ ਨੇ ਬਿਮਾਰੀ ਬਾਰੇ ਪੁਰਾਣੀਆਂ ਧਾਰਨਾਵਾਂ ਨੂੰ ਪੂਰੀ ਤਰ੍ਹਾਂ ਬਦਲ ਦਿੱਤਾ ਹੈ। ਇਸ ਨਵੀਂ ਜਾਣਕਾਰੀ ਨਾਲ ਨਾ ਸਿਰਫ਼ XDP ਦੇ ਮਰੀਜ਼ਾਂ ਲਈ, ਸਗੋਂ Huntington’s ਅਤੇ Parkinson’s ਵਰਗੀਆਂ ਹੋਰ ਗੰਭੀਰ ਦਿਮਾਗੀ ਬਿਮਾਰੀਆਂ ਦੇ ਇਲਾਜ ਲਈ ਵੀ ਨਵੇਂ ਰਸਤੇ ਖੁੱਲ੍ਹਣ ਦੀ ਉਮੀਦ ਹੈ। ਫਿਲਹਾਲ, ਇਸ ਬਿਮਾਰੀ ਦਾ ਕੋਈ ਪੱਕਾ ਇਲਾਜ ਨਹੀਂ ਹੈ ਅਤੇ ਸਿਰਫ਼ Botox ਵਰਗੇ ਮਹਿੰਗੇ ਅਤੇ ਆਰਜ਼ੀ ਤਰੀਕਿਆਂ ਦੀ ਵਰਤੋਂ ਕੀਤੀ ਜਾਂਦੀ ਹੈ। ਵਿਗਿਆਨੀਆਂ ਨੂੰ ਉਮੀਦ ਹੈ ਕਿ ਇਹ ਖੋਜ ਭਵਿੱਖ ਵਿੱਚ ਜੀਨ-ਅਧਾਰਤ ਥੈਰੇਪੀਆਂ ਅਤੇ ਲੰਬੇ ਸਮੇਂ ਤੱਕ ਅਸਰਦਾਰ ਰਹਿਣ ਵਾਲੇ ਬਿਹਤਰ ਇਲਾਜ ਵਿਕਸਤ ਕਰਨ ’ਚ ਮਦਦਗਾਰ ਸਾਬਤ ਹੋਵੇਗੀ।
